我上愛唱的囡仔歌
https://www.youtube.com/watch?v=fZBP9N7V7yw
https://www.youtube.com/watch?v=_uJXaAHc_HY
每一个人攏有家己上愛聽的歌，我嘛是仝款。尤其這首「一天過了又一天，身軀無洗是全全銑，走去溪仔邊洗三遍，毒死烏仔魚~哎喲!數萬千。」貧惰仙的囡仔歌，歌詞內底講著一个無愛清氣，規身軀癩爛癆的人。有一工，伊毋知影是家己擋袂牢，抑是想通矣，就家己走去溪仔邊洗身軀，想袂到因為身軀傷過腌臢，煞共溪仔的烏魚攏毒毒死。見擺我若聽著這首囡仔歌，就會想起一層遺憾的代誌。阮阿祖是一个作穡人，逐擺若是落田轉來，身軀一定攏會沐著漉糊糜仔，看起來實在真垃儳。熱天時閣較慘，因為熱人日頭赤焱焱，身軀會流足濟汗，所以阿祖若轉來，身軀就有足重的臭汗酸味。逐擺阿祖對園裡轉來，若看著我佇大廳抑是門口埕𨑨迌，攏會倚過來想欲共我抱、佮我開講。毋過細漢的我真毋捌代誌，看著阿祖身軀遮腌臢，就趕緊鼻仔掩的緊走。有一擺，我毋知對佗位聽著這首囡仔歌，就唱予阿祖聽，笑阿祖會共烏魚毒毒死，害阿祖真傷心，從此以後，伊作穡轉來，就毋捌閣欲來抱我、揣我開講。後來我大漢，就綴阿爸、阿母搬去大都市，生活無閒，就罕得轉去庄跤看阿祖。逐擺若唱著這首囡仔歌，我就會想起我的阿祖，想起伊對我的疼惜，想起我是按怎共笑，害伊掠準我無佮意伊。唱著這塊囡仔歌，我嘛會想起阿祖對我的包容，雖然我傷著阿祖的心，毋過阿祖猶原定定買糖仔餅佮𨑨迌物轉來予我，毋捌對我受氣。彼工佇網路看著一齣影片號做「無米樂」，影片內底的作穡人佮阿祖仝款，攏是跤踏實地，認真作穡的人，毋驚爛塗、毋驚規身軀重汗，用心種出好食的米，這款毋驚艱苦的精神實在值得咱學習。所以若是唱著「貧惰仙」這塊歌，就會予我想起阿祖。嘛因為這塊歌，予我了解身軀看起來垃圾的人，無一定是因為伊無愛清氣，嘛有可能是因為伊拄才去作穡，咱看人，毋通干焦看外表就好，因為干焦看一个人的外表，有可能會產生誤會造成遺憾。這首歌嘛提醒我，千萬毋通因為人的外表，就去笑人。這就是我佮意這首囡仔歌的原因啦!我的演講到遮結束，多謝逐家！
我的心內話
https://www.youtube.com/watch?v=r8D5MuTuDlA
https://www.youtube.com/watch?v=8k95Csy8Hm4
我的阿母對我真好，我的阿媽對我嘛真好，毋過這兩个對我遮爾好的人，兩个感情敢若無偌好？阿媽無笑的時陣，面腔真歹看。直腸直肚的阿媽，若起性地，講話定定會去得失人。毋過阿媽的心肝其實是足好的，俗語講：「刀仔喙，豆腐心。」阿媽就是這款人啦！阿媽是一个足疼孫的人。伊講用洗衫機洗襪仔洗袂清氣，所以我若放學轉來，伊攏堅持用手共我洗臭襪仔。我若考試考一百分，阿媽就會予我一百箍共我鼓勵，我就共錢儉起來。若有好食物，阿媽嘛一定會留予我食。抑若阮阿母咧，伊真有健康觀念，煮的菜攏較汫、較無油臊，阿媽食袂合，嘛會嫌菜煮了無夠爛，害伊無法度哺。閣因為阿爸逐工攏愛加班，暗時7點外才會轉來，所以阿母會佇6點外共暗頓先攢好，叫阿媽先食。因為阿媽食老耳空重，阿母叫阿媽食飯的聲音可能有較細聲，所以阿媽無聽著。阿媽等啊等，等無人叫伊食飯，枵甲大腸告小腸，伊風火夯起來，就共佇樓頂的阿母叫落來罵。阿母感覺真委屈，對彼擺了後，就真少佮阿媽講話矣。阿母若欲出門，袂共阿媽講一聲，轉來的時嘛袂共阿媽相借問，兩个人袂輸生份人仝款。看阿母佮阿媽按呢，我的心肝頭真艱苦；毋過囡仔人有耳無喙，我閣會當講啥物咧！我會當做的，就是做一个乖囡仔，阿媽希望阿母做的，就換我來做。所以我放學轉來，攏會大聲共阿媽講：「阿媽，我轉來矣！」阿媽的跤皮較粗，為著欲保護阿媽的雙跤，暗時我會共阿媽穿襪仔。若欲去睏，我嘛會共阿媽講暗安。阿媽定定呵咾我乖巧閣好喙，共我疼命命！我足想欲共阿母講：「阿媽就是愛人好喙共叫一聲爾爾，這一聲代表的是阿母你對伊的尊重，是按怎阿母你哪會做袂到咧？是按怎你無欲較好喙的咧？煮暗頓的時，阿母你嘛愛加減煮一寡阿媽愛食的菜，按呢阿媽就袂雜唸矣！」這就是我無法度共阿母講的心內話，向望阿母佮阿媽兩个，會當早一日有講有笑。我的演講到遮結束，感謝逐家。
留言列表
